Иницијативата „Сите за Палестина” организира протестен марш за солидарност со народот во Палестина и Либан. Протестот е најавен за утре, сабота (30 ноември); во 12:00 часот пред скулптурата „Симфонија на мирот”, посветена на холокаустот од Втората светска војна.
„Целта ни е да нагласиме дека холокаустот не смее да се повтори! Без разлика на кој јазик плачат децата чии родители се убиени и на кој јазик ги оплакуваат родителите своите убиени деца! Протестот, неслучајно, е закажан ден после 29 Ноември, Денот на Републиката на нашата поранешна заедничка татковина. Југославија, како што треба, била голем поддржувач на борбата против колонијализмот и во таа насока ја признавала Палестина. Денес, од државите наследнички на Југославија, само три имаат отстапено од оваа позиција и не ја признаваат Палестина: Македонија, Косово и Хрватска“, стои во најавата.
Протестот ќе заврши пред Владата, бидејќи оваа, како и претходните вазалски власти, се оглушува на напорите на хуманото човештво да се заузда израелската воена машина и да се стави крај на војните и страдањето во Палестина и Либан.
Од власта бараат:
* Да прекине со вазалското послушништво кон империјалниот господар и да се вклучи во меѓународните напори да се стави крај на насилството!
* Да се приклучи кон мнозинството држави во светот што ја признаваат палестинската држава!
* Да прекине со практиката во Генералното собрание на ОН да гласа „воздржано” или „против”, поткопувајќи ги напорите да се спречи геноцидот и да се постигне мир!
* Да се приклучи кон повиците за воведување на ембарго за дотурот на оружје за израелската воена машина!
* Да даде јасно до знаење дека го почитува Меѓународниот кривичен суд и дека ќе ги екстрадира во Хаг Бенјамин Нетанјаху и Јоав Галанд ако тие станат достапни за македонските власти!
* Да се приклучи кон државите и меѓународните организации што ја поддржуваат јужноафриканската пријава на Државата Израел за геноцид пред Меѓународниот суд на правдата!, стои во најавата.