ДБ КАРГО планира да укине 5.000 работни места до 2029 година, изјави вчера шефот на товарниот огранок на Дојче Бан, Сигрид Никута, што е повеќе од договореното со претставниците на работниците.
ДБ Карго со години ги намалува загубите, а според одлуката на Европската комисија, матичната компанија Дојче Бан можеби повеќе нема да ги „покрива“ со финансиски аранжмани.
На почетокот на 2022 година, по жалба од конкурентите, Брисел покрена истрага за државна помош за ДБ Карго, а на крајот на ноември заклучија дека се одобрени 1,9 милијарди евра во согласност со регулативите на ЕУ.
Планот за реструктуирање треба да обезбеди одржливо работење на ДБ Карго до крајот на 2026 година, а договорот за пренос на добивката и загубите на државата истекува на 1 јануари 2025 година, утврдија во Брисел.
Затоа Синдикатот на железници и транспорт (ЕВГ) и работничкиот совет започнаа преговори со раководството за програмата за штедење и во октомври се договорија во почетната фаза да бидат укинати 2.300 работни места. Сепак, шефот на менаџментот постојано предупредуваше дека, според сите сметки, повеќе работници ќе мора да ја напуштат компанијата.
Никута во неделата изјави дека поради неповолните прогнози за економијата, повеќе работници ќе мора да ја напуштат компанијата, пред се во администрацијата. Но, отпуштањата ќе бидат распределени и во оперативниот дел на претпријатието, додаде таа, посочувајќи дека планираат да го намалат бројот на работници пред се со пензионирање на работниците.
До почетокот на годината компанијата веќе ја напуштија околу илјада вработени, главно во пензија. Околу 650 колеги добија нови понуди за работа во рамките на железничката групација, рече Никута, додавајќи дека уште 700 работници ќе заминат доброволно, со планирани стимулации.
Од перспектива на ДБ Карго, овие бројки ја намалуваат потребата за дополнителни отпуштања во следните пет години на околу 2.650 работни места. ДБ Карго има околу 31.000 вработени.