Експлозија потресе фабрика за оружје во северозападна Турција, при што загинаа 12 лица, а четворица беа повредени, соопштија официјални лица.
Експлозијата се случила во селото Кавакли во провинцијата Баликесир.
„Според првичните извештаи, 12 вработени загинаа, а четворица се пренесени во болница со повреди по експлозијата“, рече гувернерот на Баликесир Исмаил Устаоглу.
На снимката објавена од локалните медиуми се гледаат парчиња стакло и метал расфрлани надвор од фабриката, каде што беше паркирано возило на брза помош.
Истрагата беше покрената по силната експлозија во вторникот, рече министерот за внатрешни работи Али Јерликаја, објавувајќи го бројот на загинатите.
Официјални лица изјавија дека ранетите не се во сериозна состојба.
Властите ја исклучуваат можноста за саботажа
Јерликаја рече дека причината за експлозијата се уште не е позната и властите ја отфрлија можноста за саботажа. „Се обидуваме да откриеме која е причината“, рече тој.
Експлозијата се случила во 08:25 часот (05:25 по Гринич), за време на утринската смена, јавува „Ал Џезира“.
Од ударот се урнал делот од фабриката каде што се случила експлозијата – каде што се произведуваат чаури.
Косеоглу додаде дека последователниот прекин на електричната енергија ги принудил службениците да бараат луѓе кои можеби сè уште се во зградата.
Упатени се противпожарни екипи да го стават под контрола пожарот, а испратени се и здравствени и безбедносни единици, соопшти владината Дирекција за комуникации.
Одбранбена индустрија
Фабриката произведува муниција, експлозиви и ракети за домашниот и меѓународниот пазар.
Турција стана водечки извозник на оружје, особено на дронови, а претседателот Реџеп Таип Ердоган силно ја поддржува индустријата.
Овој инцидент се случи два месеци по нападот на турската државна одбранбена компанија во близина на главниот град Анкара, во кој загинаа пет лица, а 22 беа ранети.
Одговорноста за тој напад ја презеде забранетата ПКК (Работничка партија на Курдистан), по што Турција изврши неколку напади врз, како што рече, цели на ПКК во соседните Ирак и Сирија.