ЕЛЕКТРОМОБИЛНОСТА изгуби една година. Вака аналитичарите ја доживуваат годината што е зад нас. Имено, додека Америка и Кина бележат пораст на популарноста на електричните возила, продажбата во Германија бележи пад. Се почувствуваа последиците од укинувањето на привилегиите за купување електрични возила, а особено беа погодени германските производители.
Во текот на минатата година во Германија се продадени 380.609 електрични возила, што е пад од дури 27,4 отсто во однос на претходната година. Ова го намали пазарниот удел на електрични возила на 13,5 проценти.
Во исто време, продажбата на хибриди драстично се зголеми. Продадени се 947.398 примероци што е раст од 12,7 отсто во однос на претходната година. Така, хибридите зазедоа пазарен удел од 33,6 отсто. Значително поскапите plug-in хибриди забележаа плус од 9,2 отсто со продажба од 191.905 единици.
Бензинскиот мотор и понатаму е првиот избор на Германците. Минатата година купиле 991.948 примероци, што е плус од 1,4 отсто во однос на годината пред тоа. Пазарниот удел на бензинците е 35,2 отсто. Останатите 17,2 отсто од уделот отпаѓаат на дизелите, кои ги избрале 483.261 купувач.
Гледајќи ги брендовите, VW и понатаму е број 1 во Германија. Со продадени 536.888 автомобили забележа пораст од 3,4 отсто и освои 19,1 отсто од пазарот. Да, секој петти продаден автомобил во Германија доаѓа од VW.
Со оглед на подемот на хибридите, јасно е дека Toyota значително ги подобри своите позиции. Продажбата скокна за 27 отсто. Сепак, најголем раст забележа Peugeot со плус од 44 отсто и 67.454 единици. Од друга страна, кај премиум играчите, BMW го задржа истиот резултат, Mercedes падна за 7 отсто, а Audi за 18,1 отсто.
Од друга страна, продажбата на Tesla драстично падна. Продале само 37.574 примероци, што е пад од дури 41 отсто. Уште полош пад бележи Polestar со минус од 49,1 отсто. Речиси подеднаков пад забележаа премиум играчите како Aston Martin (-46%) и Maserati (-48,3%).