Графичките картички некогаш се користеле исклучиво за подобрување на гејмерското искуство на компјутерите, но денес нивната примена е многу поширока. Nvidia, компанија која започна како производител на опрема за игри, денес стана столб на развојот на вештачка интелигенција, уредување видео, производство на графика и други напредни технологии.
Пазарната вредност на компанијата достигна неверојатни 3,33 трилиони долари, што претставува раст од над 170% во споредба со претходната година.
И покрај овие импресивни бројки, Џенсен Хуанг, извршен директор на Nvidia, има неочекуван поглед на неговата компанија.
„И покрај тоа што имаме 32.000 вработени, ние сè уште сме релативно мала компанија. Треба внимателно да ги фокусираме нашите ресурси на области каде што можеме да дадеме единствен придонес“, истакна Хуанг во интервју за медиумите.
За споредба, технолошките гиганти како Google имаат над 180.000 вработени, додека Apple вработува повеќе од 160.000 луѓе. Сепак, Nvidia се издвојува по својата ефикасност и фокус. „Нашето правило е да правиме само работи што другите не ги направиле или работи што можеме да ги направиме многу подобро“, објаснува Хуанг.
Кога го прашаа за плановите за проширување и превземања, извршниот директор на Nvidia го задржа својот став за фокусиран развој. „Кој друг може да го направи NVL72? Кој има способност да прави прекинувачи како Spectrum X? Затоа го правиме она што го правиме“, нагласи Хуанг.
Компанијата продолжува да ги поместува границите во индустријата, што е потврдено со најновото протекување на информации за нивната нова графичка картичка RTX 5090, која ветува дека ќе постави нови стандарди во индустријата.