Премиерот Христијан Мицкоски се пофали на социјалните мрежи дека Апелацискиот суд ја потврдил пресудата на Основниот граѓански суд Скопје во неговиот предмет против СДСМ. Според премиерот, ова докажало дека тој и неговото семејство биле жртва на измислени и клеветнички напади.
Во април 2022 година, Основниот граѓански суд Скопје пресуди во корист на Мицкоски во случајот со СДСМ, поради објави на социјалдемократите на својата официјалната станица на Фејсбук, во кои во една го нарекуваат „пион на Груевски“.
Според судот, објава во која од СДСМ напишале „Антизападниот пион Христијан Мицкоски е продолжена рака на криминалецот Никола Груевски“, согласно членот 6 од Законот за граѓанска одговорност за клевета и навреда, претставува навреда. Мицкоски во случајот барал симболичен надомест од едно евро.
Исто така, како клевета за судот се и објави во кои пишувало „Мицкоски е пион кој се збогатил благодарение на неговиот шеф и ментор“, како и „Во 2015 година, Груевски му доделил на Мицкоски неговата фирма ’Енерготек’ ДОО 33 000 квадрати метри државно земјиште за изградба на хидроцентрали“. Во истата пишувало и дека „Фирмата е 99% сопственост на Мицкоски, а не 7%, како што ја лаже јавноста“.
Уште една клевета, според Граѓанскиот суд, било пишувањето „Мицкоски му е вечен должник на Груевски. Тој мора да го штити и прави онака како што сака Груевски. Политиките на Мицкоски се политики на Никола Груевски“.