Сезонски приспособената стапка на невработеност во еврозоната благо порасна во декември од рекордно ниско ниво од 6,2 отсто во ноември на 6,3 отсто, објави денеска Евростат.
Во Европската унија, стапката на невработеност исто така благо порасна во декември, од 5,8 отсто во ноември на 5,9 отсто.
Евростат проценува дека приближно 12,97 милиони луѓе биле невработени во Европската унија во декември, од кои речиси 10,83 милиони биле во еврозоната.
Во споредба со ноемврискиот извештај, невработеноста пораснала за 94.000 во Европската унија и за 96.000 во еврозоната.
Ако ги споредиме сегашните податоци со резултатите од декември 2023 година, невработеноста паднала за 261.000 во Европската унија и за 266.000 во еврозоната на годишно ниво.
Стапката на невработеност на младите до 25 години во декември 2024 година изнесуваше 15 отсто во Европската унија и 14,8 отсто во еврозоната.
Како што се наведува, стапката на невработеност кај жените во Европската унија е 6,1 отсто, а кај мажите 5,7 отсто.
Висока невработеност е забележана во Шпанија, 10,6 отсто, Грција 9,4 отсто, Финска 8,6 отсто, додека ниски стапки на невработеност се регистрирани во Чешка од 2,6 отсто, како и во Малта и Полска по три отсто.