ЗНАМ тврди дека нивните пратеници досега не наплатиле патни трошоци

Во врска со предложените измени на Законот за пратениците во врска со патните трошоци, партијата ЗНАМ ја информира јавноста дека нивните пратеници ниту досега наплаќале, ниту отсега ќе наплаќаат патни трошоци. Според партијата на власт, само еден колега од пратеничката група за 7 месеци има вкупно добиено околу 30000 денари по сите основи (гориво,патарини и амортизација), што претставува и помалку од направените реални трошоци за превоз од и до Собранието.

-Нашиот став во врска со овој предлог-закон на колегите од Левица останува принципиелен: ќе ги игнорираме сите предлози чија единствена цел е популизам и театризација на секоја тема. Ние сме подготвени за отварање конструктивен процес на разговори за сите прашања со сите пратенички групи, преку кој би се дошло до заедничко, општоприфатливо и најдобро решение, истакнуваат од ЗНАМ.

Партијата посочува дека само низ дијалог може да се работи за доброто на граѓаните, а преку консензус и да се обезбеди широка поддршка.

-Ако некој ги злоупотребува патните трошоци, тогаш тие што го прават тоа треба да бидат санкционирани. Движење ЗНАМ – За наша Македонија го потврдува ставот дека ниту овој закон ниту било кој друг предлог што ќе дојде од Левица нема да го разгледува или коментира, од проста причина што нивната цел е естрадизација , а не решавање на реалните проблеми. Левица не е решение на проблемот, тие се проблем за секое можно решение, стои во ставот на партијата на Максим Димитриевски.

Од Левица порачаа дека „ЗНАМ со своето соопштение покажува дека е само уште еден приврзок на корумпираниот систем“.

-Наместо да дадат безрезервна поддршка за кратење на патните трошоци, тие го релативизираат проблемот и волјата на народот. Со тоа, само докажуваат дека штом ќе им се укаже шанса, ќе ги искористат механизмите за лично богатење на грбот на граѓаните. Ги повикуваме пратениците да се вразумат, конечно да одработат согласно волјата на народот и на утрешната седница на Собранието да го изгласаат законското решение предложено од Левица за кратење на патните трошоци и прекинување на злоупотребите на народниот буџет, се вели во соопштението на опозициската партија.

Предлогот на Левица предвидува патните трошоци да се пресметуваат според пазарната цена на 6,5 литри гориво за секои 100 километри. Предлогот пресметан во пари би значел дека ако некој пратеник патува дневно 200 километри во два правци ќе земе околу 1040 денари, наместо 3200 кои ги зема сега за истите 200 километри.