Поранешната партнерка на холивудскиот актер Николас Кејџ, Кристина Фултон, поднесе тужба против него и нивниот син Вестон Кејџ, тврдејќи дека таа се здобила со „повреди опасни по живот“ во наводен напад минатата година.
Фултон (57) го обвини својот 34-годишен син, кого го опишува како „професионален борец од 136 килограми“ дека ја нападнал без причина, јавува Би-би-си.
Во тужбата се наведува дека таа бара отштета за претрпените физички, емоционални и економски последици, додека го тужи актерот за невнимание, тврдејќи дека не успеал да го спречи наводното насилничко однесување на нејзиниот син.
Вестон Кејџ беше уапсен во јуни 2023 година и обвинет за две точки за напад со смртоносно оружје, откако наводно ја нападнал неговата мајка и уште едно лице.
Тој се изјасни за невин и ги негираше обвиненијата.
Во тужбата беше наведено и дека Фултон го посетила нејзиниот син на 28 април 2024 година, откако добила пораки од неговите пријатели.
Таа тврди дека Вестон по пристигнувањето ја нападнал во „маничен бес“ и почнал да ја удира на паркингот, лифтот и фоајето на неговата зграда.
Според документите, таа се здобила со потрес на мозокот, повеќе модринки, повреди на вратот, грлото и забите, абдоминални повреди и страдала од посттрауматски стрес.
Фултон тврди дека Николас Кејџ бил свесен за „долгогодишните ментални и психолошки проблеми“ и претходните наводни насилни напади на неговиот син, но продолжил да го поддржува неговото однесување помагајќи му финансиски.
Во тужбата се наведува дека Кејџ му купил на Вестон стан до неговиот, повеќе пати го ослободувал од затвор и консумирал алкохол со него, и покрај наводните проблеми со зависноста на неговиот син.
Адвокатот на Николас Кејџ, Брајан Волф, тужбата ја нарече „апсурдна“.
„Вестон Копола е 34-годишен маж. Г-дин Кејџ не го контролира неговото однесување ниту е одговорен за наводниот напад на неговата мајка“, изјави Волф за Би-Би-Си.
Вестон Кејџ претходно имал правни проблеми, вклучително и апсења за семејно насилство во 2011 година и возење во пијана состојба во 2017 година.