Алваро Мората призна дека жали што минатото лето го напуштил Атлетико Мадрид за Милано, откривајќи дека личните проблеми го навеле да донесе погрешна одлука. Шпанскиот напаѓач објасни дека упорните телефонски повици од тогашниот тренер на Милан, Пауло Фонсека направиле да се чувствува ценет, што на крајот го убедило да се врати во Серија А.
Мората постигна само пет гола во 16 лигашки настапи пред да се раздели со „росонерите“ по шест месеци, а пристигнувањето на Серхио Консеиао на крајот на декември одигра клучна улога во неговото заминување.
Во јануари, тој му се приклучи на Галатасарај на позајмица, договор што му помогна на Милан да го финансира потписот на Сантијаго Хименез, напаѓач кој е поблиску до тактичката визија на Консеисао.
„Фонсека ми се јавуваше секој ден. Никогаш не требаше да го напуштам Атлетико, но не се чувствував добро, а кога не си добро носиш погрешни одлуки во секој аспект од животот“, изјави Мората во интервју за „Кадена Сер“.
„Имав потреба да се чувствувам сакано и ценето. Морав брзо да донесам одлука и не сфатив дека и Симеоне се грижи за мене и ме цени. Татко ми и мојот агент ми кажаа дека правам грешка, но јас не ги послушав. Кога поминувате низ тешки времиња, сè изгледа сиво, дури и ако околу вас има луѓе кои ви го кажуваат спротивното. Да можев да се вратам назад, никогаш немаше да го напуштам Атлетико, но не можете да го промените минатото, но сега сум многу среќен“, додаде Мората.
Позајмицата на Мората со турскиот гигант е до јануари 2026 година и вклучува опција за откуп за 8 милиони евра.