Новиот канадски премиер Марк Карни го распушти парламентот и распиша предвремени избори за 28 април, јавуваат светските медиуми.
Според Би-Би-Си, долгоочекуваната одлука ќе ја започне изборната трка помалку од две недели откако Марк Карни ја презеде функцијата, наследувајќи го Џастин Трудо во време на зголемени тензии со САД.
„Се соочуваме со најважната криза во нашиот живот поради неоправданите трговски акции на претседателот Трамп и неговите закани за нашиот суверенитет“, изјави лидерот на Либералната партија пред новинарите во Отава по состанокот со генералниот гувернер за да побара распуштање на парламентот.
„Барам од Канаѓаните силен, позитивен мандат за да се спротивставиме на претседателот Трамп и да изградам нова канадска економија која работи за сите затоа што знам дека ни требаат промени – големи промени, позитивни промени“, додал тој.
Изборите требаше да се одржат до 20 октомври, но експертите велат дека Карни се надева дека предвременото гласање ќе биде од корист за неговата Либерална партија, која е во голем подем.
Либералите, кои ја водеа владата од 2015 година, уживаа зголемена поддршка по објавата на Трудо во јануари дека планира да се повлече и поради повторените закани од Трамп.
Царините на американскиот претседател и повиците за анексија на Канада поттикнаа гнев и неизвесност, а многу Канаѓани го поддржаа силниот и обединет одговор на либералната влада кон Вашингтон.
По долгогодишни критики за начинот на кој се справуваат со зголемените трошоци за домување и кризата со достапност, либералите сега се во тесна трка со опозициските конзервативци, покажуваат неодамнешните анкети.
Уште во јануари ториевците имаа двоцифрена предност пред своите ривали и се очекуваше лесно да победат на локалните избори.