Елон Маск и седуммина членови на неговиот Оддел за владина ефикасност (DOGE) синоќа дадоа интервју за „Фокс њуз“, бранејќи ги своите напори во услови на јавно незадоволство и загриженост поради кратењата на клучните владини агенции.
За време на интервјуто со водителот Брет Бајер, Маск и членовите на неговиот тим постојано се обидуваа да ги смират стравувањата за таргетирање на агенции како Управата за социјално осигурување. Маск, исто така, го минимизираше бројот на отпуштени државни службеници, тврдејќи дека станува збор за мал процент од вкупната владина работна сила и дека дел од нив доброволно си заминале.
„Во суштина, речиси никој не доби отказ“, изјави Маск.
Иницијативата на Маск предвидуваше отпуштање или понуда за откуп на 100.000 федерални вработени, иако судовите наредија повторно вработување на илјадници работници, откако беше утврдено дека биле незаконски отпуштени.
Маск и неговиот тим брзо акумулираа моќ во федералните агенции откако Доналд Трамп го започна својот втор претседателски мандат. Тие го предводеа расформирањето на УСАИД, најголемиот светски извор на хуманитарна помош, и отпуштија илјадници владини работници. Персоналот на DOGE, исто така, доби пристап до чувствителни владини податоци.
Во интервјуто, тимот на Маск ги претстави своите напори како клучни за опстанокот на владата и тврдеше дека нивните реформи ќе им помогнат на Американците. Запрашан за написот во „Вашингтон пост“, во кој се тврди дека кратењата во Администрацијата за социјално осигурување предизвикале повеќекратни падови на веб-страницата на агенцијата и значително зголемени чекања, Маск рече дека ќе ја подобри платформата и ќе ги зголеми придобивките.
„Легитимните приматели на социјално осигурување ќе добијат повеќе пари, а не помалку“, изјави Маск. „Нека остане запишано дека јас го кажав тоа.“
Членовите на DOGE го истакнаа своето претходно искуство како технолошки извршни директори, тврдејќи дека можат да донесат иновации од Силиконската долина во владата.
„Навистина веруваме дека владата може да нуди искуство слично на Apple Store“, изјави Џо Гебиа, член на DOGE и ко-основач на Airbnb.
Вчерашното интервју за „Фокс њуз“ дојде во време кога за викендот се најавени национални протести против Маск во салоните на „Тесла“.
Многу членови на DOGE се под лупа поради нивната младост и недостаток на искуство во владата. Нивното однесување во агенциите предизвика дополнителни критики од федералните вработени, кои пријавиле дека персоналот на DOGE се изолира од другите, ги крие своите имиња на видео-повиците и поставил кревети за спиење во федералните згради.
Неколку членови на тимот на Маск веќе се вмешани во скандали поврзани со нивната соодветност за работа со чувствителни владини системи кои влијаат на милиони луѓе.
Според истражувањето на „Ројтерс“, Едвард Користин, 19-годишен „висок советник“ во Стејт департментот, претходно ѝ давал техничка поддршка на сајбер-банда.
Друг член на тимот, 25-годишниот Марко Елез, кој имал пристап до системите на Министерството за финансии, поднесе оставка откако „Вол Стрит Журнал“ откри дека тој е поврзан со профил на социјалните мрежи кој промовира расизам и евгеника.
Заедно со групата млади инженери во DOGE, неколку од најдоверливите директори на Маск од неговите приватни компании преминаа на владини функции. Стив Дејвис, кој му помогна на Маск во масовните отпуштања во X (поранешен „Твитер“) и стана претседател на неговата Boring Company во 2018 година, наводно раководи со секојдневните операции на DOGE.
Дејвис седеше покрај Маск за време на интервјуто.
Анкетите покажуваат дека мнозинството американски гласачи не ја одобруваат иницијативата на Маск, а ставовите кон DOGE се поделени по партиска линија.
Популарноста на Маск меѓу Американците, според анкетата на Истражувачкиот центар „Пју“ спроведена во јануари, исто така е намалена, а генералниот став кон извршниот директор на „Тесла“ е претежно негативен.
Маск претходно се појави на „Фокс бизнис“ овој месец за да ги пофали достигнувањата на DOGE, како и да најави дека планира да го удвои персоналот на тимот.
Во истото интервју, Маск изјави дека со „големи тешкотии“ ги води своите компании – X, SpaceX и Tesla – поради неговата работа во администрацијата на Трамп.
Тој изгуби околу 100 милијарди долари од своето лично богатство поради падот на акциите на „Тесла“ оваа година.
При крајот на интервјуто, Бајер прикажа дел од разговорот еден на еден со Маск, во кој тој беше прашан за коментарите на сенаторот од Аризона, Марк Кели, кој го нарече „предавник“ поради неговата посета на Украина.
Маск возврати дека военото и астронаутското искуство на Кели не се релевантни ако тој „ги става интересите на друга земја над американските“.