Претседателот на Украина, Володимир Зеленски, денеска упати сочувство до сите семејства кои ги загубија своите најблиски во рускиот ракетен напад врз Криви Рог и посочи дека само со координирана акција со партнерите, Украина може да го запре убиството, да ги спаси животите на децата и да воспостави траен мир.
„Трагично денеска во болница почина тригодишниот Тимофиј. Седумгодишниот Радислав. Арина, која засекогаш ќе има седум години. Деветгодишниот Херман. Петнаесетгодишниот Данило. Петнаесетгодишниот Никита. Петнаесетгодишната Алина. балистичка ракета на Криви Рог“, напиша Зеленски на платформата Х.
Како што наведе, поминале само неколку минути откако ракетата била лансирана од непријателскиот регион Таганрог.
„За жал, загинаа и девет возрасни лица. Моето сочувство до сите семејства и нивните најблиски“, рече тој.
Според него, ракетата погодила обична улица со станбени згради, игралиште, продавници и ресторан.
„Во нападот повредени се 62 лица, меѓу кои 12 деца. Некои од нив се во критична состојба, моментално се во болници. Лекарите прават се за да спасат животи“, рече Зеленски.
Како што нагласи, покрај таа балистичка ракета, Русите вчера за време на спасувачката акција лансираа и нападни беспилотни летала на Криви Рог во време на таква тага за луѓето.
„Во нападот со дрон се повредени седум лица. Едно лице загина. Едноставно нема подлабоко ниво на цинизам, подлост или омраза кон луѓето од она што Русија го претставува денес“, напиша Зеленски.
Според него, клучно е овој руски напад да не се остави без одговор од светот.
„Крии Рог и цела Украина беа веќе поддржани од многумина вчера и денес. Благодарен сум за принципиелната позиција на министрите за надворешни работи на Чешка, Финска, Литванија, Латвија, Естонија и Австрија. И благодарам на високиот претставник на Европската унија за надворешна политика и безбедност (Каџи Калас) за нејзината позиција и поддршка“, рече Зеленски.
„За жал, одговорот на американската амбасада е изненадувачки разочарувачки – толку силна земја, толку силен народ, а сепак толку слаба реакција. Се плашат дури и да го кажат зборот „руски“ кога зборуваат за ракетите во кои загинаа деца“, нагласи Зеленски.
Како што изјави, „војната мора да заврши, но за да заврши, не смееме да се плашиме“.
„Не смееме да се плашиме да извршиме притисок врз оној кој ќе ја продолжи оваа војна и да ги игнорира сите предлози на светот да ја прекине. Мораме да извршиме притисок врз Русија таа што избира да убива деца наместо да избере прекин на огнот. Мора да има дополнителни санкции против оние кои не можат да постојат без балистички напади врз соседна нација. Мора да направиме се што е во наше за да можеме да спасиме животи“, посочи Зеленски.
За ова, како што рече, се разговарало, особено со американската страна, за дополнително снабдување со противвоздушни одбранбени системи за одбрана токму од овој тип на ракетни напади.
„Сметаме на нашите договори со претседателот на Соединетите Американски Држави (Доналд Трамп), кој вети дека ќе помогне да се најдат повеќе „патриоти“. И ние сметаме на светската сила за да го победиме ова зло, оваа војна, оваа руска агресија“, нагласи Зеленски.
Тој изјави дека само со сила и координирана акција со партнерите, Украина може да го запре убивањето, да ги спаси животите на децата и да воспостави траен мир.
„Им благодарам на сите што беа со Украина од самиот почеток на оваа војна, а особено во таквите трагични денови. Вечен спомен на сите наши луѓе чии животи беа одземени од руските напади“, рече Зеленски.
Бројот на загинати во рускиот балистички напад на Криви Рог се искачи на 19, а 68 лица се повредени, објави „Укринформ“.
Меѓу загинатите има и девет деца, јавува „Танјуг“.