Само неколку недели откако се појавија во голем број на линијата на фронтот во Украина, руските камиони „ГАЗ-69“, музејски дела од 1950-тите, очигледно за првпат учествуваа директно во нападот на украинските позиции.
„Ние сме чекор поблиску до нападот со „ГАЗ-69“, напиша аналитичарот со отворен код Мокласен на 1 април. Се покажа дека тој бил во право“, пишува „Форбс“.
Нападот во четвртокот кај Билохоривка, на границата меѓу регионите Луганск и Доњецк во источна Украина, заврши лошо за најмалку еден „ГАЗ-69“, воен камион со погон на четири тркала, тежок околу 1,6 тони, произведен во московската фабрика Молотов меѓу 1952 и 1972 година.
Овие камиони се целосно незаштитени, освен што некои руски војници импровизно заваруваат метални кафези за да ги заштитат од беспилотни летала.
Дури и на најдобро опремените руски јуришни трупи им е тешко да ги пробијат минските полиња, области под постојан артилериски оган и под надзор на украински беспилотни летала. Слабо заштитените групи кои користат цивилни камиони, теренски возила и мотоцикли поминуваат уште полошо.
И покрај тоа, руската армија се повеќе користи цивилни возила бидејќи изгуби повеќе од 20.000 борбени возила наменети за војна, а индустријата не е во состојба да произведе нови доволно брзо за да ги надомести загубите, пишува „Index.hr“.
Ова делумно објаснува зошто руските сили, иако побројни, со веројатно над половина милион војници на истокот на Украина, не успеваат да постигнат поголем напредок.
„Иако Русија има предност на поголемиот дел од линијата на фронтот, зимската офанзива даде ограничени резултати, што покажува дека ситуацијата во Украина не е безнадежна“, заклучи Татаригами, основач на украинската аналитичка групација „Фронтелиџенс Инсајт“.
Ова, се разбира, не значи дека некои руски единици кои се подобро опремени или едноставно имаат повеќе среќа нема да постигнат помала територијална добивка. Според Украинскиот центар за одбранбени стратегии, руските сили постигнале одреден напредок јужно од Билохоривка во последните денови.
Но, во поширока смисла, руската војска во Украина е сè понеопремена да спроведе големи офанзиви и подеднакво не е опремена да ги искористи локалните пробиви кога тие ќе се случат. Армијата, која некогаш беше позната како една од најсилните механизирани сили во светот, сега забрзано се „демеханизира“.
🇷🇺How are things going for the world’s second army?
A column of civilian cars with Russian disposable stormtroopers, led by a Stalin-era GAZ-69, is heading one way, to hell🔥 #UkraineWarNews… pic.twitter.com/27QKRmJ2tW
— ✝ ⚔️ Hunter UA ✠ 🇺🇸🇺🇦 (@UaCoins) April 11, 2025