Познатиот акционен актер Жан-Клод Ван Дам изјави дека сака да ја посети Русија како „амбасадор на мирот“. Во бизарно видео што стана вирално на социјалните мрежи, а првпат беше објавено на „Телеграм“ од проруски новинар од Украина, маж кој се претставува како холивудскиот акционен херој вели дека за него би било чест да преземе таква улога. Обраќајќи му се директно на Владимир Путин, тој рече: „Сакаме да дојдеме во Русија. Ќе се обидеме да го направиме тоа, ако вие го сакате, да бидам амбасадор на мирот“.
Ова не би било првпат човекот познат како „Мускулите од Брисел“ да ја посети Русија. Во 2010 година беше гостин на Путин на турнир во боречки вештини во Сочи. Поранешниот бодибилдер со белгиско потекло ја споделува љубовта кон боречките вештини со рускиот претседател, кој и самиот е носител на црн појас во џудо, а наводно се познаваат со години. Ван Дам во видеото вети дека во Русија ќе зборува само за мир, спорт и среќа, а не за политика. Видеото заврши со порака: „Голем бакнеж за Русија и за Путин“.
Jean-Claude Van Damme intends to come to Russia and become an ambassador of peace. What do you think about this? pic.twitter.com/fKQgF2SRym
— Russian Road (@RussianRoad_) April 17, 2025
Поголемиот дел од познатите личности јавно ги осудија постапките на Владимир Путин откако ја нападна Украина во февруари 2022 година, но неколкумина сè уште го поддржуваат. Еден од најистакнатите меѓу нив е американскиот актер Стивен Сигал. Сигал има и руски пасош и е чест посетител на земјата, а делува и како специјален претставник на Москва за руско-американски хуманитарни односи. Сепак, на претседателската инаугурација на Путин минатата година, тој одби јавно да објасни зошто го поддржува рускиот лидер.