Рускиот претседател Владимир Путин прогласи велигденски прекин на огнот во Украина, наредувајќи им на своите сили да ги запрат сите непријателства денес и утре, додека украинскиот претседател Володимир Зеленски го нарече потегот „игра со човечки животи“. „Велигденското примирје“ на Путин очигледно не се одржа и Русија и Украина меѓусебно се обвинуваат за прекршување на договорот. Зошто, тогаш, Москва предложи прекин на огнот?
Воениот аналитичар на Sky News, Шон Бел, вели дека зад ова стојат три главни причини. Првата причина е начинот на кој примирјето ќе биде претставено пред руската јавност.
„Ова е можност Путин пред домашното население да се прикаже како миротворец, како некој што сочувствува со својот народ“, објаснува Бел.
Втората причина, за која Бел вели дека е „многу поцинична“, е тоа што Путин го користи прекинот на огнот за да премести 50.000 руски војници од регионот Курск. Според извештаите, руските сили сега контролираат 99% од територијата која претходно беше под украинска окупација во јужна Русија.
Зошто е тоа важно? Затоа што Русија сега сака да ги премести тие 50.000 војници назад на фронтот во Донбас. Ваквите операции траат со денови – војниците треба да се преместат, да одморат и да се снабдат. Не би бил изненаден доколку Русија ја искористи оваа пауза за да ги прегрупира силите пред нов голем напад – вели Бел.
Третата причина, според Бел, е поврзана со загриженоста на Кремљ дека американскиот претседател Доналд Трамп може да се откаже од идејата за реинтеграција на Русија во меѓународната заедница.
Трамп неодамна изјави дека би можел да се повлече од мировните преговори доколку која било од страните „прекомплицира работите“, па Бел верува дека Путин предложил прекин на огнот за да се обиде да ги придобие САД.
„Трамп му нуди можност на Путин да престане да биде меѓународен отпадник – враќање во Г8, помало присуство на НАТО на границите на Русија, па дури и олеснување на санкциите. Мислам дека Путин е малку загрижен – Трамп е непредвидлив и лесно може повторно силно да се сврти кон Украина. А тоа би било многу лошо за Русија“, рече тој.