Започна судењето на познатиот рап-могул Шон „Диди“ Комбс, познат и како Пи Диди, кој се соочува со сериозни федерални обвиненија, вклучувајќи трговија со луѓе и рекетирање. Комбс моментално се наоѓа во притвор во Бруклин, додека процесот привлекува големо медиумско внимание. Адвокатскиот тим на Комбс побара одложување на судењето за два месеци, наведувајќи дека им е потребно повеќе време за преглед на доказите и подготовка на одбраната. Меѓутоа, федералниот судија Арун Субраманијан го одби барањето, наведувајќи дека обвинетиот располага со доволен број адвокати и имал доволно време за подготовка.
На предсудските сослушувања, Комбс делувал смирено и достоинствено, а во неколку наврати насмевнато мавтал кон присутните во судницата. Досега носеше затворска облека, но судијата му дозволи за време на судењето да носи гардероба по сопствен избор. Процесот на избор на поротата започнува денес и се очекува да трае до крајот на неделата. Судијата најави дека ќе бидат отпуштени стотици потенцијални поротници пред да се формира порота составена од 12 членови и шест алтернативни поротници.
Обвинителката Емили Џонсон информираше дека на владата ѝ се потребни три недели за да го презентира случајот, додека одбраната на Комбс процени дека ќе има потреба од една недела за својата презентација. Судењето ќе биде отворено за јавноста, но нема да се емитува онлајн. Комбс категорично ги негира сите обвиненија и одбива да се согласи на спогодба за признавање вина. На истото рочиште, обвинителите открија дека раперот ја отфрлил понудата за договор со обвинителството. Тој изјави дека е целосно свесен за можните последици доколку биде прогласен за виновен.
Во паралелни граѓански постапки, Комбс исто така ги негира обвинувањата, нарекувајќи ги „болни“ и тврдејќи дека се поднесени од „поединци кои бараат брза исплата“.