Еден од најпопуларните лекови на нашата планета е аспиринот. „Волшебната“ пилула, која ја ублажува болката, но е ефикасна и за намалување на треската, за разбивање на згрутчување на крвта и за заштита на срцето, сега се користи во речиси најоддалечените делови на светот.
И покрај фактот дека е стар повеќе од еден век, аспиринот со децении стана се побаран лек на сите континенти и стана незаменлива секојдневна терапија за многумина.
Лековитите својства на супстанциите што се користат за правење аспирин, сепак, им биле познати на луѓето долго пред откривањето на овој лек.
Старите Грци знаеле за претходникот на аспиринот, а Хипократ, во петтиот век п.н.е., користел прашок добиен од врби за да ја намали болката и треската кај болните.
Иако луѓето, во вековите што следеле, често користеле слични состојки кои се ставаат во модерната „волшебна“ пилула за да се намали треската и да се ублажи болката кај пациентите, дури во 19 век, поточно во 1829 година, бил откриен натриум салицилат, претходник на денешниот аспирин. Оваа супстанца најчесто се користела за лекување на заболени од треска. Сепак, натриум салицилат не бил добро прифатен или користен бидејќи предизвикувал стомачна болка и други стомачни проблеми.
Во средината на 1870-тите, била откриена салицилна киселина, која исто така можела да ја ублажи болката и да ја намали телесната температура, без да предизвика големи стомачни проблеми. Феликс Хофман, германски хемичар, во 1897 година ја открил ацетилсалицилната киселина, многу поефикасна и помалку штетна супстанција од претходните, и така е создаден првиот аспирин.
Иако Хофман го создал овој лек за да ја ублажи болката на својот татко, кој страдал од артритис, аспиринот се покажал како исклучително добар лек за голем број здравствени проблеми и брзо станал широко користен. Во раните години на минатиот век започна масовното производство на аспирин, кој брзо го најде својот пат до клиентите.
Експертите и денес откриваат нови лековити ефекти на „волшебната“ пилула која се произведува насекаде низ светот во различни форми и под различни имиња.