Силна бура што ги погоди југоисточните делови на Австралија предизвика ненадејни поплави што изолираа неколку градови во внатрешноста, а некои жители мораа да се засолнат на покривите од своите домови, соопштија локалните власти.
Најпогодени беа руралните заедници во регионите Хантер и Среден Северн Коуст во Нов Јужен Велс, објави Ројтерс. Некои области добија повеќе од четиримесечна количина на дожд во последните 24 часа.
„Се справуваме со огромна количина дожд. Земјата е веќе заситена со вода, реките се прелеваат, а дождот едноставно не престанува“, изјави министерот за вонредни ситуации на Нов Јужен Велс, Џихад Диб, пренесува Танјуг.
Австралискиот метеоролошки завод предупреди дека во следните 24 часа би можеле да наврнат до 300 милиметри дожд, што е три пати повеќе од просечните врнежи од дожд во мај.
Во градовите Тара и Гленторн, на реката Менинг, повеќе од 300 километри северно од Сиднеј, луѓето се качуваа на веранди и покриви додека спасувачките екипи се мачеа да стигнат до нив со брод и воздух преку ноќ.
Комесарот за итни служби, Мајк Весинг, изјави дека приоритет е спасувањето на најранливите и оние кои не можат да ги напуштат своите домови. „Во моментов се фокусираме на луѓе кои се на покривите или на подовите од своите куќи“, рече Весинг.