Поранешниот припадник и командант на ЕСН Волци Македонија Стефан Ивановски и Ана Нешковска која била негова сопатничка, вработена во Министерството за одбрана се загинатите во сообраќајната несреќа кај касарна „Илинден“, кога мотоцикл со скопски регистарски ознаки, управуван од Ивановски излетал од коловозот и удрил во бетонски столб.
Со емотивен статус на својот Фејсбук профил за загинатите се прости и ексминистерката за одбрана, Славјанка Петровска.
„Не сакав да поверувам во лошата вест, не сакав да прифатам дека вие двајца сте загинатите во сообраќајната несреќа, не сакав да прифатам дека туѓа неспособност и негрижа прекинаа два живота.
Стефан Ивановски, го запознав како скромен, но исклучително способен офицер, посветен командант на армиските Волци, кој живееше за државата, Армијата и неговото семејство. Го гледав како еден од идните столбови на Генералштабот.
Ана Нешовска, работлива, кротка, но полна со енергија и желба да го промени светот, за неа не постоеше ништо невозможно…Ја гледав како првата жена раководител на военото разузнавање.
Вашето несреќно заминување не скрши сите, изгубивме многу, Министерството и
Армијата изгубија многу, но за жал најголема загуба за вашите прекрасни семејства.
Нема зборови на утеха, има само зборови за сочувство во оваа огромна тага. Почивајте во мир“, напиша Петровска на својот Фејсбук профил.