Постои дивергенција меѓу американските ETF („Exchange Traded Fund“/„Фонд со кој се тргува на берза“), бидејќи инвеститорите се префрлаат од златото кон неговиот таканаречен дигитален еквивалент, биткоинот.
Во текот на изминатите пет недели, американските Bitcoin ETF-и забележаа прилив од над 9 милијарди долари, предводен од iShares Bitcoin Trust ETF (IBIT) на BlackRock Inc. Во истиот период, фондовите за инвестирање во злато забележаа одлив од над 2,8 милијарди долари, според податоците собрани од Bloomberg News.
Иако ублажувањето на трговските тензии неодамна ја намали побарувачката за традиционални безбедни засолништа како златото, перцепцијата за Биткоинот како алтернативно складиште на вредност е во пораст – во согласност со растечките загрижености за фискалната стабилност на Соединетите Американски Држави.
Биткоинот достигна рекордно високо ниво од 111.980 долари претходно овој месец, поттикнат од поволни регулаторни сигнали – вклучувајќи го и напредокот во законодавството за стабилни монети (stablecoin) – како и зголемената макроекономска неизвесност. Златото, иако порасна за повеќе од 25% оваа година, се повлече од неодамнешните максимуми, тргувајќи се со околу 190 долари под својот максимум досега.
Аналитичарите веруваат дека овој потег сигнализира растечко прифаќање на Биткоинот како легитимно хеџирање на портфолиото. „Останувам оптимист и за златото и за Биткоинот“, рече Кристофер Вуд, стратег за глобални акции во Jefferies, според Seebiz.
„Тие остануваат најдобрата заштита од слабост на валутата во светот на Г7“, додаде.
Скептиците, сепак, предупредуваат дека нестабилноста на Биткоинот продолжува да го поткопува неговиот статус како сигурно „безбедно засолниште“. За време на претходните макроекономски шокови, како што беше колапсот во август на „carry trade“ финансиран од јенот, Биткоинот нагло падна заедно со другите ризични средства.
Други, пак, веруваат дека Биткоинот добива на тежина.
„Биткоинот е поефикасен во заштитата од системски финансиски ризици поради неговата децентрализирана природа“, напиша Џеф Кендрик, глобален раководител на истражувањето на дигитални средства во Standard Chartered, во неодамнешна анализа. Тој го спореди ова со посилните перформанси на златото за време на геополитички превирања, како што се зголемувањето на тарифите.
Кендрик додаде дека Биткоинот служи како заштита на два фронта: од ризици поврзани со приватниот сектор – како што е колапсот на банката „Силиконската долина“ во 2023 година – и од ризици поврзани со владините институции, вклучително и загриженоста за стабилноста на американското Министерство за финансии.
„Неодамнешната закана за независноста на ФЕД (во контекст на можна замена за Пауел) спаѓа во втората категорија, заедно со ескалацијата на царините и растечките сомнежи за кредибилитетот на економската политика на САД“, заклучи тој.