Милијардерот и извршен директор на Тесла и Спејс Екс, Елон Маск, ги негираше тврдењата на „Њујорк тајмс“ дека земал толку многу кетамин што му е нарушено здравјето, вклучително и проблеми со мокрењето.
Во серија објави на неговиот профил на социјалните мрежи X, Маск рече: „Да бидам јасен – НЕ земам дроги! „Њујорк тајмс“ очигледно лаже. Пробав кетамин на рецепт пред неколку години и тоа го кажав јавно на X претходно, така што ова не е вест. Ми помогна да се извлечам од тешки ментални состојби, но оттогаш не сум го земал.“
Според „Тајмс“, Маск наводно користел кетамин, екстази и халуциногени печурки за време на претседателската кампања во 2024 година. Извори тврдат дека тој користел кетамин речиси секојдневно, понекогаш мешајќи го со други супстанции, што предизвика загриженост кај неговите соработници. Не е јасно дали оваа практика продолжила откако станал дел од администрацијата на Доналд Трамп.
Маск одигра клучна улога на изборите во 2024 година, донирајќи околу 290 милиони долари за поддршка на Трамп и републиканците. По победата на Трамп, Маск беше назначен да раководи со таканаречениот „Оддел за ефикасност на владата“, со цел намалување на федералната бирократија и прилагодување на владините институции кон политиката на MAGA. Сепак, во среда беше објавено дека неговата вклученост во администрацијата завршува.
Тој одговори на обвинувањата со бројни објави на X: „Секој ден сум на состаноци со десетици, дури и стотици луѓе, и постојано ме фотографираат. Ако овие глупости на NYT беа вистинити, би биле повеќе од очигледни“. Сепак, „Тајмс“ истакнува дека Маск неодамна покажал „непредвидливо однесување“, вклучувајќи јавни навреди кон државниот секретар Марко Рубио и чести објави на X во секое време.
За време на појавувањето со Трамп во Овалната соба во петокот, Маск беше виден со модринка во окото. Тој им кажа на новинарите дека неговиот 5-годишен син, познат како X, е виновен: „Се игравме, и јас реков: „Удри ме во лице“, и тој го стори тоа.“
Маск се сети дека како шеф на SpaceX, кој соработува со американската влада, е подложен на случајни тестови за дрога: „Три години бев тестиран случајно само затоа што еднаш се отпушив со @JoeRogan во емисијата!“, напиша тој на X. Сепак, „Тајмс“ тврди дека честопати знаел за тестовите однапред.
Во друга објава, тој категорично ги негираше обвинувањата: „Не сум на кетамин, за Бога мили!“
Кога беше прашан за обвинувањата за употребата на дрога од страна на Маск, Трамп рече: „Не знаев ништо за тоа. Воопшто не ме загрижуваше. Мислам дека Илон е фантастичен.“
Маск претходно јавно зборуваше за неговата употреба на кетамин. Во март минатата година, во интервју за новинарот Дон Лемон, тој рече дека повремено користи мали дози кетамин – околу еднаш на секои две недели – на рецепт од она што го нарече „вистински лекар“.
„Понекогаш имам негативна хемиска нерамнотежа во мозокот, како депресија, која не е поврзана со никаков специфичен настан – тогаш кетаминот ми помага да се извлечам од таа состојба“, рече Маск. Сепак, тој додаде: „Ако земете премногу кетамин, не можете да си ја работите работата. А имам многу работа. Обично работам 16 часа на ден, па немам луксуз да бидам ментално бавен“.