Игор Стоименов од Кочани, еден од повредените во трагедијата што се случи во дискотеката „Пулс“, наместо политички обвинувања, ја повикува јавноста и институциите да го насочат вниманието кон реалните потреби на настраданите.
„Секој ден ни е борба. Болка, печење, чешање, отекување – и така во круг. Имаме потреба од лекарска грижа 24 часа, а со еден доктор тоа е невозможно“, вели триесетгодишниот Стоименов, кој претрпел тешки телесни повреди.
Тој апелира дека додека властите и опозицијата си префрлаат вина за трагедијата, повредените секојдневно се соочуваат со болка и несигурност, без доволна медицинска поддршка.
„Не ни треба политика, ни треба грижа. Ни треба надеж“, порачува Игор.
Стоименов има тешки изгореници – третостепени на левата рака со трансплантирана кожа, второстепени на левиот бицепс и пресадена кожа на десната рака до лактот. Поради повредите, не смее речиси цела година да се изложува на сонце.
Тој веќе неколку пати алармира дека е неопходно итно зајакнување на капацитетите во болницата во Кочани, бидејќи процесот на рехабилитација е долг и бара постојана медицинска грижа. Апелот на Игор е јасен – да се тргне фокусот од камерите и политичките пресметки, и да се покаже човечност и солидарност токму тогаш кога е најпотребна.