Ѕвездата на култната серија „Сексот и градот“ и нејзиниот современ продолжеток „И токму така…“, Сара Џесика Паркер, во ново интервју за британскиот Гардијан зборуваше отворено за предизвиците на нејзината долга и изложена кариера, за промените во серијата и за личниот раст на својот лик – Кери Бредшо.
Паркер, која со децении е дел од светската поп-култура, признава дека низ годините често била цел на критики, осудувана за улогите што ги прифаќала и одлуките што ги носела. „Распната сум цел живот“, вели актерката, „но научив да останам верна на себе“.
Во новата сезона, серијата го следи развојот на врската помеѓу Кери и нејзиниот поранешен љубовник Ејдан, но и интригата што ја носи новиот сосед, кого го игра Џонатан Кејк. Според Паркер, токму зрелоста на Кери е она што ја прави оваа сезона посебна. „Таа сега реагира различно, поинаку размислува. И тоа е сосема природно. И ние, актерите, се менуваме – и не треба да се плашиме од тоа“, вели таа.
Секако, стилот на Кери Бредшо останува во фокусот – од огромни шапки до уникатни фустани, секогаш е чекор пред модата. Но, Паркер со доза на иронија зборува и за новите трендови во Њујорк: „Секаде гледам жени во хеланки. Разбирам дека се во движење, дека им е удобно, но понекогаш ми доаѓа да кажам – вложете малку труд. А потоа се фаќам себе си дека осудувам… и се повлекувам. Кој сум јас да пресудувам што е удобно за некого?“
Актерката се осврна и на контроверзите околу ликот на Че Дијаз, небинарен комичар во серијата, кого го игра Сара Рамирез. По бурните реакции на публиката, Че не се појавува во третата сезона. Паркер, и покрај сè, има само пофалби за соработката со Рамирез: „Не следам што се зборува по социјалните мрежи. Работата со него ми беше задоволство“.
Што се однесува до личните односи, Паркер остана воздржана, но искрена, кога беше прашана за студениот однос со нејзината колешка Ким Катрал: „Животот на јавна личност е комплексен. Од нас се очекува да бидеме љубезни, иако можеби во тој момент ни се случува нешто тешко. Но, ако тоа е цената, јас ја прифаќам – не се жалам.“
Финалето на третата сезона од „И токму така…“ се очекува на 14 август, а според најавите, љубителите на серијата ќе добијат комбинација од хумор, емоции и развој на ликовите што ги следат веќе две децении.