Microsoft подготвува специјална верзија на својата алатка за вештачка интелигенција Copilot за Министерството за одбрана на САД (DoD), што би можело да означи една од најголемите и најчувствителните апликации на технологијата за вештачка интелигенција во владиниот сектор
Во блог пост наменет за владини корисници, Microsoft потврди дека работи на верзија на Microsoft 365 Copilot што ќе биде прилагодена на барањата за висока безбедност на американските одбранбени системи.
Microsoft изјави дека верзијата на Copilot за Министерството за одбрана се очекува најрано во летото 2025 година, истакнувајќи дека усогласеноста со потребните безбедносни и регулаторни стандарди сè уште е во тек.
Copilot е клучна алатка на Microsoft базирана на генеративна вештачка интелигенција, дизајнирана да ги автоматизира задачите и да ги поддржува вработените во рамките на апликациите на Microsoft 365 – како што се Word, Excel и PowerPoint.
Иако компанијата инвестираше огромни ресурси во развој на понуди за вештачка интелигенција, сè уште бара оптимални бизнис модели за нивна комерцијализација. Според „Бизнис инсајдер“, главниот комерцијален директор на Microsoft, Џадсон Алтоф, неодамна на интерен состанок изјави дека еден од неговите клиенти со повеќе од милион лиценци за „Microsoft 365“ наскоро ќе го распореди Copilot.
Иако не ја именуваше компанијата, бројот на потенцијални кандидати што можат да распоредат решение за вештачка интелигенција за милион корисници е многу ограничен – а Министерството за одбрана на САД е сигурно еден од нив. Според извештајот од 2023 година на Канцеларијата за одговорност на владата на САД (GAO), Пентагон има околу 2,1 милиони воени лица и 770.000 цивилни вработени. Министерството не одговори на барањето на медиумите за коментар на оваа тема.
Microsoft претходно објави планови за овозможување на употребата на Copilot во верзии од својот софтверски пакет за владини корисници, вклучително и оние во системи со највисоко ниво на заштита.
На официјалната веб-страница на компанијата моментално е наведено дека „Копилот“ сè уште не е достапен во рамките на „GCC High“ околината, што е облачна платформа на Microsoft наменета за владини институции на САД со посебни безбедносни барања. Сепак, во ажурирањето на 31 март, компанијата потврди дека работи на интегрирање на Copilot во овие средини, а достапноста е планирана да започне подоцна оваа година.
„За организациите во GCC High средината, Microsoft 365 Copilot е сè уште во развој за да ги исполни барањата за безбедност и усогласеност“, се вели во соопштението. „Планираме да имаме општа достапност во текот на оваа календарска година.“