Легендарниот поранешен кошаркар Владе Дивац (57) се повреди за време на одмор во Црна Гора, каде што падна од мотоцикл во близина на полуостровот Луштица во Бока Которска.
Според црногорските портали, Дивац не можел да стане по падот поради сериозна повреда на колкот, а сведоците на несреќата биле видливо потресени бидејќи некогаш познатиот центар не можел ниту да се движи. Српските и црногорските медиуми набрзо објавија дека Дивац е итно хоспитализиран и опериран. Интервенцијата била неопходна за да се спречат можни компликации, но, според првичните информации од болницата, неговата состојба е стабилна и не е животозагрозувачка.
Поранешниот НБА ас се огласи и на социјалните мрежи. Тој кратко објави на Инстаграм: „Ви благодарам на сите за пораките и повиците. Сè е во ред, добро сум, да продолжиме напред.“
Владе Дивац остави неизбришлив белег во кошарката, како во поранешна Југославија, така и во НБА. Ја започна својата кариера со Партизан, а подоцна играше за Лос Анџелес Лејкерс, Шарлот Хорнетс и Сакраменто Кингс. Тој беше еден од првите европски центри што се етаблираше во најсилната кошаркарска лига во светот, познат по својата техника, луцидни додавања и врвно чувство за игра.
Освои бројни медали со југословенската репрезентација, вклучувајќи го Светското првенство во 1990 година и Европското првенство во 1989 година, а подоцна играше за репрезентацијата на Србија и Црна Гора. По завршувањето на играчката кариера, Дивац се посвети на спортската администрација и хуманитарната работа – ја основа фондацијата „Ана и Владе Дивац“, која им помага на бегалците и социјално ранливите лица.
Тој беше и претседател на Олимпискиот комитет на Србија и генерален менаџер на Сакраменто Кингс, а неговиот придонес во спортот беше награден во 2019 година со прием во Кошаркарската куќа на славните.