По две недели пад, доларот порасна во однос на кошничка валути минатата недела, бидејќи инвеститорите бараа побезбедни засолништа за капиталот поради ескалацијата на конфликтот меѓу Израел и Иран.
Индексот на доларот, кој ја мери вредноста на американската валута во однос на шест главни валути, порасна за 0,6 проценти на 98,77 поени. Еврото се лизна за 0,2 проценти на 1,1525 долари. Американската валута, исто така, зајакна во однос на јапонскиот јен, за 1,3 проценти, достигнувајќи 146,05 јени.
Доларот е под притисок веќе некое време поради нејасната, каприциозна царинска политика на американскиот претседател Доналд Трамп, а неговата вредност во однос на кошничка валути неодамна се „лизна“ на најниско ниво за три години. Сепак, откако започна ракетниот оган меѓу Израел и Иран пред околу десет дена, доларот донекаде се опорави, бидејќи се смета за побезбедно засолниште за капиталот во неизвесни времиња.
Доларот беше поддржан и од одлуката на лидерите на американската централна банка на состанокот минатата недела да ги задржат каматните стапки на сегашното ниво, и покрај повиците на Трамп за намалување на каматните стапки.
Претседателот на Централната банка, Џером Пауел, на прес-конференција изјави дека се очекува инфлацијата да се зголеми во наредните месеци поради воведувањето на царини, па затоа Федералните резерви не треба да брзаат со намалување на каматните стапки.
„Пауел јасно стави до знаење дека нема намера да ја менува монетарната политика сè додека не биде јасно како царините ќе влијаат на инфлацијата“, рече Питер Кардиљо, економист во „Спартан Капитал Секјуритис“.