Министерот за земјоделство Алојз Рајнер (CSU) и Министерството за труд, предводено од Бербел Бас (SPD), се најдоа на спротивни страни околу едно чувствително прашање: дали е фер и законски оправдано сезонските работници на германските полиња да добиваат помалку од законски загарантираната минимална плата?
Темата се разгори откако Германското здружение на земјоделци побара изземање на овие работници – најчесто дојдени од Полска, Романија или Бугарија – од важечките минимални плати. Според нив, сезонските работници, кои не живеат постојано во Германија, би можеле да бидат платени 20% пониско од актуелната минимална плата од 12,82 евра – или околу 10,25 евра на час.
„Тоа е оправдано“, изјави претседателот на здружението Јоаким Руквид, говорејќи пред земјоделскиот конгрес во Берлин. „Работниците не живеат овде, не се дел од германскиот трошочен живот, па не би требало да важат истите стандарди“. Според него, планираното зголемување на минималната плата на 15 евра би било „неизводливо“ за многу мали производители, особено во секторите на овошје, зеленчук и винска индустрија.
Но, од другата страна, Министерството за труд брзо и остро реагираше: „Овој предлог е спротивен на принципите на еднаквост и директно се коси со германското и европското антидискриминаторно законодавство“, соопштија од кабинетот на министерката Бас. Тие додаваат дека нема законска основа за селективно укинување на минималната плата, ниту такво нешто е предвидено во коалицискиот договор на владата.
И додека Министерството за земјоделство анализира „правни опции“, Министерството за труд инсистира дека обидот да се направи разлика меѓу платата на Германци и странци е правно и морално проблематичен.
Во позадина на дебатата стои и поширокото прашање за вреднување на трудот. Дали сезонските работници се само трошок – или луѓе со исти права? И дали цената на евтината храна што ја плаќаме во супермаркетите треба да се одрази и во животот на оние што ја берат?
До крајот на јуни се очекува посебна комисија да излезе со препораки за ново зголемување на минималната плата. Според германските медиуми, од јануари 2026 минималната плата би можела да достигне 15 евра.
Дотогаш, политичката сцена во Берлин останува поделена – и сезонските работници, тивки и невидливи за многумина, сè уште чекаат одговор на едно едноставно прашање: колку вреди нивниот труд?
Извор: Index.hr