Шефот на тимот на Ред Бул во Формула 1, Кристијан Хорнер, изјави дека Макс Верстапен има намера да остане со тимот следната година, и покрај шпекулациите дека би можел да се приклучи на Мерцедес, објави АП.
Верстапен постојано ја повторуваше својата посветеност на Ред Бул за 2026 година, откако Џорџ Расел од Мерцедес минатата недела сугерираше дека тимот имал разговори со холандскиот возач. Расел нема договор за 2026 година.
Четирикратниот шампион Макс Верстапен има договор со Ред Бул до 2028 година, но постојат индикации дека клаузулата поврзана со перформансите би можела да му дозволи да замине порано. Точните детали не се јавно познати.
„Договорите меѓу возачите и тимовите секогаш ќе бидат доверливи. Постои елемент на механизам за перформанси во секој договор и тоа е секако случај со Макс“, објасни Хорнер пред Големата награда на Велика Британија.
„Неговата намера е да вози за нас во 2026 година. Но, тоа е неизбежно, тој е од огромен интерес за секој друг тим“, додаде шефот на Ред Бул.
Кристијан Хорнер сугерираше дека Расел „веројатно ги предизвикал сите овие шпекулации“ за да ја зајакне својата позиција во преговорите со Мерцедес.
„Мислам дека најважно е јасноста што постои помеѓу Макс и тимот, а тоа е многу јасно“, додаде Хорнер.