Транспаренси Интернешнл го објави најновиот Индекс на перцепција на корупцијата (CPI) за 2024 година, рангирајќи 180 земји во светот според нивото на перцепирана корупција во јавниот сектор. Листата, која ја објавија бројни меѓународни медиуми и специјализирани портали како што е RankingRoyals, уште еднаш ја потврдува доминацијата на скандинавските земји кога станува збор за транспарентност и интегритет.
На самиот врв на листата е Данска со импресивен резултат од 90 поени (од можни 100), што ја прави глобален лидер во борбата против корупцијата. По неа следуваат Финска (88), Сингапур (84), Нов Зеланд (83) и Луксембург (81), сите земји со развиени институции, силни контролни механизми и високо ниво на доверба на граѓаните во системот.
Земјите од Западен Балкан не се најдоа меѓу првите 40, што укажува на потребата од понатамошно зајакнување на борбата против корупцијата, особено во јавниот сектор, судството и јавните набавки. Според претходните извештаи, земјите во регионот стагнираат или се соочуваат со пад на нивните резултати со години.
Индексот за перцепција на корупцијата служи како глобален барометар за доверба во државните институции и ефикасноста на владеењето на правото. Земјите близу до врвот на листата често се најстабилни, најразвиени и најпривлечни за инвеститорите, додека земјите со понизок ранг честопати страдаат од системски проблеми што го забавуваат нивниот целокупен развој.