Американскиот претседател Доналд Трамп изјави дека никогаш не го посетил приватниот остров на Џефри Епштајн, додека поранешниот претседател Бил Клинтон бил таму многу пати, вели тој.
„Треба да зборувате за Бил Клинтон, кој беше на островот 28 пати. Јас никогаш не сум бил“, им рече Трамп на новинарите.
На 16 јули, тој изјави дека обвинувањата против него за наводни врски со Епштајн се нова демократска афера.
Американскиот весник „Волстрит џурнал“ пред неколку дена објави дека името на претседателот Трамп се појавува на наводно писмо за роденден од 2003 година упатено до осудениот сексуален престапник Џефри Епштајн, што претседателот веднаш го негираше, најавувајќи тужба против весникот, неговиот издавач „Њуз корп“ и сопственикот Руперт Мердок.
Според весникот, писмото било дел од луксузен албум подготвен за 50-тиот роденден на Епштајн, три години пред да бидат изнесени јавни обвинувања за сексуална злоупотреба против финансиерот.
Писмото, врамено со цртеж на гола жена, содржи отчукана порака потпишана со „Доналд“ и завршува со зборовите: „Среќен роденден и нека секој ден биде уште една прекрасна тајна“.
Трамп веднаш реагираше преку социјалната мрежа „Вистина“, тврдејќи дека станува збор за „лажен“ документ, пренесува Спутник.