Mercedes-Benz размислува за промена на стратегијата за најавената помала верзија на G-класата, која би можела да добие класичен мотор со внатрешно согорување наместо електричен погон.
Дека култната G-класа ќе добие помал брат е веќе познато уште од минатогодишниот саем IAA во Минхен, каде што Mercedes ја претстави првата скица од овој модел. Извршниот директор Ола Келениус потоа конкретно го опиша како „син“ на класичната, голема G-класа.
Сепак, според извештајот на „Handelsblatts“, поради лошите резултати од продажбата на електричната G-класа, производителот размислува за инсталирање на класичен мотор во помала верзија. Најверојатната опција би бил благ хибрид базиран на новиот 1,5-литарски четирицилиндричен бензински мотор.
Се очекува „малиот G“ да биде долг помеѓу 4,30 и 4,50 метри, што го прави попрактичен за градско возење од стандардната G-класа, која е долга 4,82 метри. Веројатно ќе го задржи погонот на сите четири тркала за теренски можности, а ентериерот ќе добие големи екрани со најновите опции на софтверот MB.OS.
Чекаме септември и официјалниот почеток на IAA во Минхен, веруваме дека Mercedes-Benz ќе подготви повеќе интересни новини покрај G-класата.