На почетокот на следната година би можело да се очекува почетокот на постепеното укинување на роамингот за македонските граѓани во ЕУ, најави министерот за надворешни работи и трговија Тимчо Муцунски од Брисел.
Тој денеска и утре престојува во работна посета на Брисел, каде денеска се сретна средба со генералниот директор на Директоратот на Европската комисија за проширување и источно соседство, Герт Јан Копман.
Се разговарало за спроведувањето на реформската агенда во земјава и за регионалната соработка, „при што беше нагласена активната улога и придонесот на Република Северна Македонија во рамките на регионалните иницијативи, како и кон стабилноста и безбедноста на целиот регион“, се вели во соопштението од МНР.
Соговорниците разговарале и за актуелните геополитички и безбедносни предизвици во Европа, при што ја нагласиле важноста од продолжување на поддршката за Украина и потребата од заеднички, координиран пристап во справувањето со последиците од руската агресија.
„Во фокусот на разговорот беше и иницијативата „Роаминг како дома со ЕУ“, насочена кон постепено укинување на трошоците за роаминг помеѓу земјите од Западен Балкан и Европската Унија. Одлуката за оваа иницијатива се очекува да биде донесена на почетокот на следната година“, се вели во соопштението од МНР.