Водечкиот европски производител Volkswagen претстави ново семејство на попристапни електрични градски автомобили за да се спротивстави на кинеската конкуренција, додека германската индустрија погодена од кризата се обидува да се опорави.
Понудата на групацијата со седиште во Волфсбург, претставена како претходница на Саемот за автомобили во Минхен, се состои од четири модели од брендовите Volkswagen, Cupra и Škoda, со почетна цена од околу 25.000 евра, а ќе биде лансирана во 2026 година.
Моделите што ги претстави Volkswagen вклучуваат ID.Polo – конкурент на Renault 5 и ID.Cross, пандан на Renault 4.
Volkswagen соопшти дека постигнал значителни заштеди со користење на истата модуларна електрична платформа (MEB+) и нови VW батерии во повеќе модели.
Среднорочната амбиција е VW да има пазарен удел од околу 20 проценти во сегментот на мали електрични автомобили во Европа, што изнесува неколку стотици илјади возила годишно, се вели во соопштението.
Семејството електрични градски автомобили на VW е „наш придонес кон пробивот на електричната мобилност во служба на одржливата мобилност“ и „за силна Европа“, изјави извршниот директор на групацијата, Оливер Блуме, пред новинарите.
Volkswagen, како и неговите премиум конкуренти BMW и Mercedes, сметаат на „оживување на нивната индустрија“ на саемот IAA Mobility во Минхен.
BMW го претставува електричниот iX3 од своето семејство „Neue Klasse“ (Нова класа) во Минхен, а Mercedes претставува електрична верзија на својот успешен SUV, „GLC“.
Додека лидерите на трите групи имаат големи надежи дека новата генерација електрични автомобили ќе ја врати нивната конкурентност, лидерите на BMW и Mercedes повикуваат на преиспитување на одлуката на ЕУ за забрана на продажбата на автомобили со мотори со внатрешно согорување од 2035 година.
Во понеделник им се придружи и Италијанецот Антонио Филоса, извршен директор на конзорциумот Stellantis, четвртиот по големина во светот во автомобилскиот сектор.
Сите тие се залагаат за пофлексибилна и разновидна транзиција во типовите мотори за зачувување на европската автомобилска индустрија.