Европскиот суд за човекови права во Стразбур покрена постапка против Хрватска по тужбата поднесена од поранешниот хрватски премиер Иво Санадер и шефот на унгарскиот МОЛ Жолт Хернади.
Санадер и Хернади ја поднесоа тужбата врз основа на тоа што не добиле фер судење во Хрватска, пишува хрватскиот портал Индекс, додавајќи дека сега се очекува Хрватска да се изјасни, по што ќе следи пресуда.
Се работи за аферата Ина-МОЛ, во која Санадер беше прогласен за виновен за примање поткуп од 10 милиони евра од Хернади за да може унгарската компанија да ја преземе контролата врз хрватска Ина.
Пресудата против Санадер првично стана правосилна во 2014 година, но една година подоцна Уставниот суд ја поништи врз основа на тоа што на пониските судови не им беше дозволено да почнат да ја разгледуваат вината или невиноста на премиерот врз основа на заклучокот дека договорите меѓу хрватската влада и МОЛ биле спротивни на интересите на Хрватска.
Според Уставниот суд, ова ја замаглува разликата помеѓу индивидуалната кривична одговорност на Санадер за примање мито и политичката одговорност на хрватската влада за склучување на договорот, и го инструментализира државниот интерес со цел да се докаже вината на Санадер во кривичната постапка.
Во декември 2015 година, повторното судење на Санадер беше споено со судењето на Хернади, а четири години подоцна двајцата беа прогласени за виновни.
Клучно беше сведочењето на Роберт Јежиќ, кој, откако самиот беше уапсен во второто судење, изјави дека Санадер го замолил да го организира приемот на парите, што тој го сторил, посочувајќи на договорите склучени во јуни 2009 година помеѓу неговата швајцарска компанија Ксенопласт и две кипарски компании.
Санадер неодамна беше ослободен од затвор со условна слобода, а Хернади беше недостапен за хрватското судство во текот на целиот процес.
Давајќи детали во врска со овој случај, Индекс пишува, меѓу другото, дека Санадер и Хернади се повикуваат на член од конвенцијата што гарантира фер судење и тврдат дека нивната пресуда била произволна и спротивна на гарантираното фер судење и принципот на еднаквост на оружјата.
Тие тврдат дека не биле во можност да ја презентираат својата одбрана, дека судот, без соодветни причини, ги отфрлил нивните предлози за презентирање или увид во доказите, особено во однос на веродостојноста на сведочењето на Роберт Јежиќ.
Санадер, велат тие, во својата тужба навел и јавни настапи на бројни политичари, како и официјални изјави кои, како што тврди, ја прекршиле неговата презумпција за невиност, наведувајќи неколку примери. Хернади во својата тужба посочи дека кривичното гонење можеби застарило.
Европскиот суд за човекови права ѝ испрати на Хрватска конкретни прашања на кои очекува одговори во текот на постапката, меѓу кои клучното е: дали Санадер и Хернади имале фер судење при одлучувањето за кривичните обвиненија против нив, во согласност со член 6 од Конвенцијата.