Парискиот суд денес го прогласи поранешниот француски претседател (2007-2012) Никола Саркози за виновен за соучество во криминална организација во случајот со либиското финансирање на изборната кампања во 2007 година, објави телевизискиот канал BFM.
Во исто време, поранешниот француски претседател беше ослободен од обвиненијата за прикривање на проневера на јавни средства и пасивна корупција.
Обвинителите побараа Саркози да биде осуден на седум години затвор.
Саркози, кој отсекогаш ги негираше обвиненијата, е обвинет дека склучил договор со Гадафи во 2005 година, кога тој беше министер за внатрешни работи на Франција, за да добие средства за неговата изборна кампања во замена за поддршка на тогаш изолираната либиска влада.
Саркози е на судење од јануари по обвинение за прикривање проневера на јавни средства, пасивна корупција, нелегално финансирање на изборна кампања и криминален заговор за извршување кривично дело.
Ова е најголемото судење за корупција со кое се соочил Саркози, откако веќе беше осуден во два одделни случаи, едниот за корупција и злоупотреба на влијание за нелегално добивање поволен третман од судија, а другиот за прикривање на нелегални прекумерни трошоци на претседателските избори во 2012 година, на кои беше поразен од кандидатот на социјалистите Франсоа Оланд.
Саркози е поранешен претседател на Франција. Роден е на 28 јануари 1955 година во Париз. Тој беше претседател на Франција од 2007 до 2012 година, како член на конзервативната Унија за народно движење (UMP), која подоцна стана Републиканци (Les Républicains).