Европската Унија сака да ја спаси европската автомобилска индустрија со автономни автомобили со вештачка интелигенција што ќе бидат дозволени во многу градови во рамките на огромна нова инвестиција.
Како што пишува „Revijahak“, претседателката на Европската комисија, Урсула фон дер Лајен, започнува нова иницијатива за спасување на автомобилската индустрија и сака да воведе огромни инвестиции во автомобили што се управуваат самостојно.
– Автомобилите што се управуваат самостојно се веќе реалност во САД и Кина. Зошто истото не важи и овде во Европа – прашува Урсула фон дер Лајен.
Во својот говор на Италијанската технолошка недела во Торино, Италија, таа ги истакна големите инвестиции во вештачката интелигенција, од кои автомобилите се важен дел. Сега шефицата на ЕУ сака автономните автомобили да бидат легализирани во многу градови и тоа брзо.
– Автомобилите со вештачка интелигенција можат да го намалат сообраќајниот метеж, да ги поврзат оддалечените области со јавниот превоз и да ги направат нашите патишта побезбедни. Вештачката интелигенција значи безбедноста на прво место. Па зошто да не се воспостави мрежа од европски градови каде што првите автономни автомобили можат да се појават на патиштата.
Иницијативата за дозволување на автономни автомобили во градовите на ЕУ треба да се случи што е можно поскоро, вели Фон дер Лајен.
– Значи, пријатели мои, ајде да го оствариме тоа. Можно е и да почнеме сега. Подготвени сме да ја поддржиме автомобилската индустрија во развојот на иновативни модели што се произведуваат во Европа и се градат за европските улици. Автомобилската индустрија е гордост на Европа. Во исто време, новата технологија може да спаси работни места и да му даде нов живот на секторот, додала претседателката на Европската комисија.