Државните службеници во Грција денес ќе стапат во 24-часовен штрајк, свикан од Сојузот на синдикати на грчки државни службеници АДЕДИ поради нов нацрт-закон за труд со кој ќе се воведе 13-часовен работен ден и други измени, објавува онлајн изданието на весникот „Катимерини“.
Минатата недела, АДЕДИ повика на штрајк, барајќи враќање на 13-та и 14-та плата, значително зголемување на платите, потпишување колективни договори за работа во јавниот сектор, трајно и стабилно вработување и укинување на нов дисциплински закон.
Вчера, вработените во јавниот превоз во Атина изјавија дека и тие ќе се приклучат на штрајкот на почетокот и на крајот од работниот ден за да ги поддржат државните службеници. Поради ова, денес метрото и трамваите во грчката престолнина ќе работат во временскиот опсег од 09:00 до 17:00 часот, а автобусите и тролејбусите – од 09:00 до 21:00 часот.
Вчера, синдикатите на вработените во железницата во Грција, исто така, објавија дека ќе се приклучат на 24-часовниот штрајк, поради што возовите во Грција исто така нема да сообраќаат денес, забележува Катимерини.
Главниот протестен марш во Атина е закажан за 11:00 часот на централниот плоштад Синтагма.
На 1 октомври се одржа 24-часовен национален штрајк против новото трудово законодавство, организиран од двата најголеми синдикати во јавниот и приватниот сектор – ADEDI и GSEE, во кој учествуваа и морнари, вработени во јавниот превоз и железнички работници, а во Атина се одржа и демонстрација на илјадници луѓе со барање за повлекување на пакетот мерки што воведуваат промени во работното време.