Врховниот суд на Хрватска ја отфрли жалбата на маж од Сплит, кој беше осуден на 40 години затвор за 267 кривични дела сексуална злоупотреба и експлоатација на дете, со што неговата казна стана конечна.
Девојчето имало само пет години кога започнало монструозното злоставување. Според порталот „Далматинец“, Врховниот суд на Република Хрватска ја отфрлил жалбата на осудениот и ја потврдил неговата казна од 40 години затвор за 267 кривични дела сексуална злоупотреба и експлоатација на дете. Тој бил осуден на пет години за секое дело, а добил дополнителни три години за сериозно кршење на правата на детето. Со ова конечно завршил случајот.
Ова е една од најстрогите пресуди во судската историја на Сплит, а деталите од случајот ја потресоа јавноста. Злосторството траело пет години, почнувајќи кога детето имало пет години. Осудениот маж го силувал девојчето во просек еднаш неделно, а во последниот месец на секои два дена. Сите, освен првиот напад во кампот во близина на Шибеник, се случиле во семејниот стан, во спалната соба и бањата. Мајката на детето, која е и сопруга на насилникот, се разболела сериозно, а нејзината здравствена состојба брзо се влошила.
Тој му забранувал на детето да се дружи со врсници, ја придружувал до училиште и ја чекал пред училницата за да не комуницира со други деца. Исто така, ѝ забранувал да ги посетува своите баба и дедо, иако живееле во истата зграда. Не ѝ дозволувал да го напушти станот со денови, а кога неговото однесување изгледало „несоодветно“, ја удирал по главата и стомакот. Ја принудувал да остане гола во кадата со часови додека тој гледал.
„Казната не е претерана“
Првостепената пресуда е донесена во јуни 2024 година од судијката Вишња Стриниќ, позната по судењето против Филип Завадлав. Вишиот кривичен суд ја потврди пресудата на почетокот на 2025 година, но осуденото лице, користејќи го своето право на жалба, се обидело да избегне казна.
Во својата жалба, тој тврдел дека казната била „претерано строга“ во споредба со слични случаи. Сепак, Врховниот суд цврсто ги отфрли неговите аргументи.
„Казната не е премногу строга, особено имајќи предвид дека збирот на казните за сите 267 кривични дела за сексуална злоупотреба и експлоатација на дете, заедно со кршењето на правата на детето, би изнесувал 1.388 години. Покрај тоа, осуденото лице не наведе ниту еден сличен случај во кој е изречена полесна казна.“
Судот нагласи дека внимателно ги разгледал сите околности при донесувањето на пресудата, вклучително и психолошкиот профил на осуденото лице:
„Личноста на обвинетиот покажува нарцистички црти, тој се обидува да се прикаже како беспрекорен, иако извршил 267 сериозни кривични дела против сопственото дете. Таквиот број кривични дела бара соодветна казна што ја одразува огромната опасност што ја претставувал за својата жртва, девојче кое било целосно беспомошно пред него.“
Осудениот се обидел да ги оправда своите злосторства како „воспитни мерки“, а принудното капење го протолкувал како последица на опсесивно-компулсивно нарушување. Сепак, судот ги отфрлил овие изговори.
„Доказите јасно покажуваат дека не станува збор за родителска грижа, туку за систематска сексуална, физичка, психолошка и емоционална злоупотреба. Психијатриските прегледи целосно ги побија тврдењата за ментално растројство.“
Пресудата сега е конечна, а осудениот ќе ги помине следните 40 години во затвор.