Германија забележа нагло зголемување на бројот на млади украински мажи кои пристигнуваат во Германија откако Киев одлучи да им дозволи да ја напуштат Украина, изјави за АФП Министерството за внатрешни работи во Берлин.
Бројот на мажи на возраст од 18 до 22 години кои бараат азил во Германија е зголемен од 26 август, кога Киев ги олесни правилата за напуштање на земјата.
Во неделата од 8 септември, имало повеќе од 1.000 нови пристигнувања, а во неделата што започна на 6 октомври, имало 1.796. За споредба, во неделата што започна на 25 август, имало 138.
„Ова може да биде фаза на зголемена миграција по спроведувањето на прописите одобрени ова лето во Украина, по што бројот на мажи кои бараат заштита повторно ќе се намали“, соопшти германското Министерство за внатрешни работи.
Помеѓу почетокот на руската војна во Украина во февруари 2022 година и август 2025 година, на мажите на возраст меѓу 18 и 60 години им било забрането да ја напуштат Украина освен во итни случаи.
Сепак, лицата на возраст од 18 до 22 години не подлежат на мобилизација – минималната возраст беше намалена на 25 години во април 2024 година.