Од крајот на ноември 2025 година, Германија ќе воведе нови правила што значително ќе го променат начинот на кој луѓето купуваат преку интернет.
Корисниците на популарните опции „купи сега, плати подоцна“, кои досега можеа да се користат без сериозна проверка на кредитната историја, ќе бидат особено погодени.
Новиот закон значи дека дури и малите онлајн купувања ќе се третираат како краткорочни заеми со задолжителни проверки на финансиската сигурност на купувачот.
Овој потег доаѓа во време кога сè повеќе граѓани, особено помладите, се одлучуваат за одложено плаќање преку платформи како што се Klarna и PayPal. Ваквите услуги им овозможуваат на клиентите да нарачаат веднаш и да платат во рок од 30 дена или на повеќе рати, честопати без камата. Сепак, токму оваа леснотија на купување доведе до растечки ризик од презадолженост кај потрошувачите.
Германската влада одлучи да го усогласи своето законодавство со новата европска директива за потрошувачки кредити. Ова ќе ги третира малите, краткорочни кредити со исто ниво на надзор како и традиционалните кредити. Целта е да се спречи потрошувачите, привлечени од флексибилни модели на плаќање, да ја изгубат контролата врз своите финансии.