Европската Унија го поздрави потпишувањето на Договорот за подготовка, изградба и оперативност на меѓуграничниот железнички тунел на Коридор 8 меѓу Македонија и Бугарија.
Претседателот на Европскиот Совет, Антонио Кошта, во објава на мрежата „Х“ го оцени договорот како голем чекор напред во билатералната соработка и развојот на добрососедските односи.
„Го поздравувам потпишувањето на договорот за прекуграничниот тунел на Коридорот 8 меѓу Бугарија и Северна Македонија – голем чекор напред во соработката меѓу двете земји и промоција на добрососедските односи. Освен што развива билатерални врски, новата железница ќе го поттикне регионалниот просперитет и ќе ја зајакне нашата заедничка безбедност“, напиша Кошта.
Поддршка за проектот изрази и еврокомесарката Марта Кос, која истакна дека продолжувањето на работата на Коридорот 8 е клучно за регионалната поврзаност.
„Бугарија и Северна Македонија се согласија да ја продолжат работата на Коридорот 8 – клучен проект што ги поврзува Јадранското со Црното Море преку пат и железница. Ова е важен чекор за градење доверба преку регионална поврзаност, заеднички просперитет и подобра комуникација меѓу луѓето“, напиша Кос.
Договорот за изградба и оперативност на тунелот беше потпишан вчера во Ѓуешево од заменик-претседателот на Владата и министер за транспорт Александар Николоски и неговиот бугарски колега Гроздан Караџов.
Пругата на Коридор 8, покрај економското значење за Македонија, регионот и Европа, има и безбедносна димензија од аспект на НАТО Алијансата.