Кина воведе мерки за ослободување на чиповите на Nexperia кои ги исполнуваат барањата за цивилна употреба од ограничувањата за извоз, соопшти кинеското Министерство за трговија, објави Ројтерс.
Портпаролот на министерството изјави дека Кина очекува конкретни активности од Холандија за решавање на спорот околу Nexperia, што доведе до недостиг на чипови на компанијата и го загрози европското производство на автомобили. Кина го прифати барањето на Холандија да испрати претставници во Пекинг на разговори за ситуацијата со Nexperia.
Кинеското Министерство за трговија во понеделник изјави дека ги поздравува континуираните напори на Европа да ја повика Холандија да ги исправи своите „нефер“ практики.
Производителот на чипови Nexperia е со седиште во Холандија, но е во сопственост на кинеската компанија Wingtech Technology.
Холандската влада ја презеде контролата врз Nexperia на 30 септември за да ја спречи компанијата да го премести производството од Европа во Кина. Како одговор, кинеската влада го блокираше извозот на производите на компанијата од 4 октомври. Акциите доведоа до недостиг на чипови на Nexperia, кои се широко користени во автомобилската индустрија.
Европскиот комесар за трговија, Марош Шефчовиќ, вчера во објава на социјалната мрежа X изјави дека Пекинг ќе одобри исклучоци од барањата за лиценцирање на извоз за производите на Nexperia, под услов купувачите да се обврзат да ги користат чиповите само за цивилни цели.
Шефчовиќ тесно соработува со кинеските и холандските власти за да постигне „траен и стабилен“ консензус што ќе обезбеди целосно враќање на снабдувањето со полупроводници.