Голем пожар избувна во понеделник во хрватскиот главен град Загреб во облакодерот „Вјесник“ – поранешна зграда на печатницата, која е во државна сопственост и не се користи повеќе од 20 години, објавија хрватските медиуми.
Пожарот избувнал околу еден час пред полноќ (21 часот по наше време) и се проширил вертикално, зафаќајќи неколку ката и покривот на зградата. Во гаснењето учествувале 93 пожарникари со 30 противпожарни возила и друга опрема. Според сегашните информации, во зградата немало никој во моментот на пожарот.
Командантот на противпожарната служба на Загреб, Синиша Џембрих, зборувал за сложеноста на гаснењето на пожарот за Хрватското радио.
Според него, откако добиле сигнал за пожарот, пожарникарите „се упатиле кон врвот на зградата и почнале да го гаснат“ пожарот. Џембрих додаде дека потоа виделе дека и долните катови горат, што покренало сомневање дека причината за пожарот можеби била во инсталациите, кои, според него, биле „исклучително опасни“. Тој рече дека пожарникарите требало да ја напуштат зградата и да го изгаснат пожарот однадвор.
Вицепремиерот и министер за просторно планирање, градежништво и државен имот, Бранко Бачиќ, како и градоначалникот на Загреб, Томислав Томашевиќ, пристигнале на местото на пожарот.
Состојбата на местото на пожарот е подобра утрово, според извештаите на медиумите. Пожарот е смирен и нема големи пламени, иако некои катови сè уште горат. Зградата се испитува со термовизиска камера, а веќе пристигнал и градежен инженер за да ја процени состојбата на објектот. Улиците и булеварот околу зградата „Вјесник“ се затворени за сообраќај, објави Дирекцијата за цивилна заштита.
Се очекува гаснењето на пожарот да продолжи во текот на целиот ден.
Во соопштението за медиумите од Министерството за просторно планирање, градежништво и државен имот, цитирано денес од хрватските медиуми, се наведува дека Република Хрватска е косопственик на деловниот комплекс „Вјесник“ заедно со други правни лица.
„Делот погоден од пожарот се користи за сместување на архивата на печатницата, додека страничниот дел од „Вјесник“, кој Министерството за просторно планирање, градежништво и државен имот го користи за работа на своите вработени, не беше зафатен од пожарот. Министерството ќе ги преземе сите мерки за санирање на штетата и што е можно поскоро обновување на целиот комплекс“, се вели во соопштението.