Германскиот канцелар Фридрих Мерц изјави дека рускиот претседател Владимир Путин мора да прифати дека нема да излезе со успех од војната во Украина и дека нејзиното продолжување е безнадежно.
„Сакаме оваа војна да заврши што е можно побрзо. Но, договор постигнат меѓу големите сили без согласност на Украина и без согласност на Европејците нема да биде основа за вистински, траен мир во Украина“, изјави Мерц, цитиран од Ројтерс.
Вчера, украинскиот претседател Володимир Зеленски изјави дека е подготвен да понуди рамка поддржана од САД за завршување на војната со Русија и да разговара за спорните прашања со американскиот претседател Доналд Трамп во разговори за кои рече дека треба да ги вклучат и европските сојузници.
„Одлуките за европските прашања можат да се донесуваат само со заедничка согласност. Украина не е пион, туку суверен актер кој ги брани сопствените интереси и вредности“, изјави Мерц пред Долниот дом на парламентот.
Канцеларот додаде дека Германија ќе продолжи да го поддржува украинскиот народ и ќе ги користи замрзнатите руски средства за оваа намена.