Молдавските власти во саботата објавија дека руски беспилотни летала влегле во воздушниот простор на земјата, претставувајќи закана за авијацијата. Ова е трет ваков инцидент за девет дена.
Претседателката Маја Санду, чија цел е да ја внесе Молдавија во Европската унија до 2030 година, ја осуди војната на Русија во Украина и ја обвини Москва дека се обидува да ја дестабилизира поранешната советска држава, која се наоѓа помеѓу Украина и членката на ЕУ, Романија.
Последниот инцидент се совпадна со големиот руски напад врз Киев, во кој беа убиени три лица, а речиси 30 беа ранети. Украинскиот претседател Володимир Зеленски изјави дека Русија лансирала околу 36 ракети и речиси 600 беспилотни летала, според Ројтерс.
Молдавското Министерство за внатрешни работи објави дека идентификувало две беспилотни летала како руски, кои летале над молдавска територија, поради што воздушниот простор бил затворен. Подоцна, тие биле забележани на украинска територија, додаваат оттааму.
„За време на овој инцидент, кој претставуваше сериозна закана за безбедноста на летовите, воздушниот простор на Молдавија беше затворен еден час и 10 минути од 22:43 до 23:53 часот (20:43 до 21:53 по локално време) по наредба на Управата за цивилно воздухопловство“, се вели во соопштението.
„На пат да убиваат цивили, руските беспилотни летала повторно го нарушија молдавскиот воздушен простор, принудувајќи го привремено да се затвори. Ги осудуваме овие напади и стоиме зад Украина“, напиша Санду на „X“.
A brutal 10h attack on Ukraine. This is not the language of diplomacy, nor of a country claiming to negotiate peace.
On their way to kill civilians, Russian drones again violated Moldovan airspace, forcing its temporary closure. We condemn these attacks and stand with Ukraine.
— Maia Sandu (@sandumaiamd) November 29, 2025
Молдавија, која се пожали на сличен упад на 20 ноември и повторно претходно оваа недела, го опиша најновиот инцидент како заплашување и ги осуди „нелегалните и опасни дејствија што ги загрозуваат цивилните летови и животите на луѓето“.
Амбасадорот на Русија во Молдавија, Олег Озеров, неколку пати беше повикан во Министерството за надворешни работи поради инцидентите. Озеров сугерираше дека инцидентите имале за цел влошување на веќе лошите односи меѓу Москва и Кишињев.
Откако Санду беше избранa за прв пат во 2020 година, Москва ја обвини Молдавија дека стои зад непријателските дејствија и поттикнување антируски чувства.