Извршниот директор на групацијата „Фолксваген“, Оливер Блуме, најави мерки за заштеда на трошоци за да се осигури дека компанијата ќе остане конкурентна и профитабилна, изјави германскиот автомобилски гигант.
„Ако компанијата сака да продолжи да заработува од возила и да остане конкурентна во иднина, трошоците мора постојано да се оптимизираат“, рече Блуме на состанок со вработените во Волфсбург.
Тој рече дека од „Фолксваген“ се бара да произведува нови производи и најнапредни технологии и дека сега станува збор за зголемување на продуктивноста и поедноставување на процесите.
Блуме ја нагласи важноста од јасно усогласување на групацијата со барањата на иднината и реалноста на пазарот, објави агенцијата ДПА.
„Само економски силна компанија може да биде сигурен работодавач“, им рече извршниот директор на работниците.
Кон крајот на декември 2024 година, по долги преговори и неколку предупредувачки штрајкови, „Фолксваген“ и синдикатот се согласија за програма за реструктуирање што ќе елиминира 35.000 работни места во Германија до 2030 година.
За возврат, компанијата ги потврди договорите за работа и сигурноста на работното место до 2030 година, објави „Срна“.