Украинскиот претседател Володимир Зеленски денес изјави дека со нетрпение очекува да се врати во Полска како дел од официјалната посета, заблагодарувајќи му се на претседателот на земјата Карол Навроцки за разговорот и изразувајќи надеж дека посетата ќе отвори нова, посуштинска фаза во односите меѓу двете земји.
Зеленски во објава на мрежата X рече дека односите меѓу Украина и Полска одат подалеку од соседските врски и претставуваат соработка на два европски столба без кои нема да има слобода или сигурна безбедност во тој дел од Европа.
„Украинската и полската независност се основата што им овозможува на сите нации во нашиот дел од Европа да живеат слободно, без власта на Москва. Затоа е потребно да соработуваме, да се поддржуваме едни со други и да ги координираме нашите напори во одбраната на Европа и нашите народи“, рече украинскиот претседател.
Навроцки: Пристигнувањето на Зеленски во Варшава е лоша вест за Путин
Посетата на украинскиот претседател Володимир Зеленски на полската престолнина Варшава е лоша вест за Русија, бидејќи покажува единство меѓу европските земји по стратешки важни прашања, изјави пак Навроцки.
„Оваа посета докажува дека по стратешките прашања, кога станува збор за нашата стратешка соработка по безбедносни прашања, Полска, Украина, земјите во регионот исполнети со демократски вредности, се обединети, а тоа никогаш не било доведено во прашање“, рече Навроцки за време на прес-конференцијата со Зеленски, пренесе Ројтерс.
Украинскиот претседател Володимир Зеленски доцна синоќа пристигна во Полска, каде што денес беше пречекан во претседателската палата во Варшава од неговиот полски колега Карол Навроцки.