Унгарскиот премиер Виктор Орбан изјави дека поразот на Украина би претставувал сериозен проблем и за Унгарија, нагласувајќи дека е во интерес на Будимпешта да го спречи колапсот на земјата.
„Доколку Украина ја изгуби војната и доживее колапс, тоа би бил сериозен проблем за Унгарија. Затоа, во наш интерес е не само да го спречиме распадот на Украина, туку и да направиме многу за да го спречиме тоа да се случи. Војната не ја зајакнува Украина, туку ја уништува“, рече Орбан.
Неговата изјава предизвика бран критики, со оглед на тоа што Унгарија долго време, според проценките на бројни европски функционери и аналитичари, систематски ја спречува помошта за Украина и ги блокира клучните одлуки на Европската Унија поврзани со поддршката за Киев.
Орбан постојано ги блокираше или забавуваше пакетите за финансиска и воена помош за Украина, како и обидите на земјата да напредува на патот кон членство во ЕУ. Поради таквото однесување, Будимпешта често се опишува како фактор на нарушување во рамките на ЕУ, па дури и како „петта колона“ на Кремљ во европските институции.