Министерката за надворешни работи на Албанија, Елиса Спиропали, за време на нејзината официјална посета на Македонија истакна на целосното спроведување на Охридскиот договор, унапредување на правата на Албанците и почитување на употребата на албанскиот јазик во Македонија. Таа нагласи дека Албанците, како државотворен народ, имаат клучна улога во демократските процеси, во одржувањето на стабилноста и во заштитата од дестабилизирачки надворешни влијанија, директно помагајќи ја земјата на патот кон Европската Унија.
„Конструктивната улога на Албанците и нивните политички претставници во мнозинството или опозицијата останува витална за продолжување на реформите и напредокот на европскиот пат. Препознавајќи ја оваа реалност, го поздравуваме доследното спроведување на Охридскиот договор, кој е меѓународно загарантиран документ за мир и коегзистенција. Веруваме дека Охридскиот рамковен договор е еден столб за соживотот овде и функционалноста“, изјави министерката за надворешни работи на Албанија.
Инаку, Спиропали нагласи дека силно ја поддржуваат Македонија кон европскиот пат и тоа, како што вели, не само поради тоа што двете земји се партнери, туку затоа што нашата земја со јаки институции е сигурност за целиот регион.
-Уште еднаш се покажа дека нашиот пат е вистинскиот и дека европската иднина на Албанија е неодолива од траекторијата на Западен Балкан. Овој процес не го гледаме како натпревар меѓу земјите кандидатки, туку како пат кој го одиме заеднички, дестинација која е неизбежна и природна припадност на нашите народи, посочи шефицата на албанската дипломатија.
За време на посетата, министерката најави и дека Албанија ќе отвори конзулат во Битола, како чекор кон зајакнување на билатералната соработка и поддршка на албанските граѓани во овој регион.
Од друга страна, министерот за надворешни работи, Тимчо Муцунски изјави дека земјата одамна заслужува членство во Европската Унија, но нагласи дека нема да има отстапки без силни гаранции за заштита на македонскиот јазик и националниот идентитет.
„Постои ризик од зголемување на европесимизмот. Има граѓани кои веруваат во европската иднина на државата, но се сомневаат дали Европа ќе ни ги отвори вратите. Ова е теза што мора заедно да ја побиеме“, рече Муцунски.
Албанија и Македонија првично беа дел од истиот пакет во процесот на европска интеграција, но поради недостаток на потребните уставни измени, патот на земјава кон Европската Унија останува блокиран сè додека не се исполнат овие услови.